جسٹس بشیر احمد سعید
افسوس ہے چند ماہ ہوئے جسٹس بشیر احمد سعید صاحب کابھی کم وبیش ۸۴ برس کی عمر میں دل کا دورہ پڑنے سے ان کے وطن مدراس میں انتقال ہوگیا۔ مرحوم بڑے فعال ومتحرک اورسرگرم وپُرجوش مسلمان تھے انہوں نے مسلمانوں کی تعلیمی ترقی کے لیے مدراس میں وہی کیا جوڈاکٹر عبدالغفور نے کیرالا میں کیا تھا، ’’جنوبی ہند کے مسلمانوں کی تعلیمی انجمن‘‘کے صدر کی حیثیت سے انہوں نے مدراس میں دو عظیم الشان کالج تعمیر کرائے ایک لڑکوں کے لیے اوردوسرا لڑکیوں کے لیے، آج یہ دونوں کالج مدراس یونیورسٹی کے نمایاں اورترقی یافتہ کالج سمجھے جاتے ہیں۔
مرحوم آل انڈیا شخصیت کے بزرگ تھے، سالہا سال وہ علی گڑھ یونیورسٹی کی مرکز کونسل اور کورٹ کے نہایت بااثر اورفعال ممبر رہے، آل انڈیا مسلم مجلس مشاورت اورآل انڈیا مسلم پرسنل لابورڈ دونوں کے سرگرم رکن تھے۔ سرکاری ملازمت سے سبکدوشی کے بعد ان کے شب و روز قومی کاموں میں ہی بسر ہوتے تھے۔ نماز،روزہ کے بڑے پابند،قرآن مجید کی تلاوت ان کے مشاغل یومیہ میں شامل، ندوۃ المصنفین کے شروع سے معاون تھے، برہان بڑے شوق سے پڑھتے اوراس کی بڑی قدر کرتے تھے، غرض کہ بڑی خوبیوں اوراعلیٰ اخلاق و صفات کے بزرگ تھے۔ حق گوئی اورحق پژوہی ان کاجوہر فطری تھا، انگریزی کے بڑے اچھے مقرر تھے، اردو میں بھی اظہار مدعاپر قادر تھے، تقریر بڑے جوشیلے انداز میں کرتے تھے۔ اس میں شک نہیں کہ ان کا نفس وجود مسلمانوں کے لیے بڑی تقویت کاسبب تھا کیونکہ وہ قانون دان بھی تھے اورمسلمانوں کے سچے ترجمان ووکیل بھی۔ [جولائی۱۹۸۴ء]