مولانا محمد عثمان
افسوس ہے چند ماہ ہوئے مولانا محمد عثمان صاحب کا بھی اپنے وطن مالیگاؤں میں انتقال ہوگیا۔مولانا دارالعلوم دیوبند کے فارغ التحصیل تھے، استعداد پختہ تھی۔ یوں تو ان کومناسبت اوردلچسپی کم وبیش ہرفن سے تھی تاہم تفسیر اور حدیث ان کا خاص فن تھے۔ ایک عرصہ تک مالیگاؤں کے مختلف مدارس میں استاد رہے لیکن ان کی زندگی کاسب سے بڑااوراہم کارنامہ جوان کے لیے بقائے دوام کا ضامن ہے، مسلمان لڑکیوں کے لیے درس نظامی کاوہ عظیم الشان مدرسہ ہے جومالیگاؤں میں جامعۃ الصالحات کے نام سے معروف ومشہور ہے، اب تو لڑکیوں کے لیے بڑے بڑے عربی مدارس ادھراُدھر اوربھی کئی ایک ہوگئے اور ہوتے جارہے ہیں لیکن صوری اورمعنوی دونوں اعتبار سے جامعۃ الصالحات کو یک گونہ شرف فضیلت و تقدم حاصل ہے اوریہ سب کچھ نتیجہ ہے مولانا مرحوم کے اخلاص ومحبت،محنت ومشقت اور ذوق تعمیر وحسن انتظام کا۔
راقم نے کئی مرتبہ جامعہ کی دورۂ حدیث کی طالبات کاامتحان لیاہے اور ہرمرتبہ طالبات کے صحیح اور برمحل جوابات سے دل نے مسرت محسوس کی ہے۔ ان کو جامعۃ الصالحات سے عشق تھا، شب وروز اس کے کاموں میں مصروف رہتے تھے۔ اﷲ تعالیٰ ان کوعلماوصلحا کا مقام جلیل عطافرمائے اورجامعۃ الصالحات کوکسی قسم کے شر اورضررسے محفوظ رکھے۔ [جولائی۱۹۸۴ء]