مولانا افضل حسین
یکم جنوری ۱۹۹۰ء کو جماعت اسلامی ہند کے قیم مولٰینا افضل حسین صاحب کا انتقال ہوگیا ہے۔ اِنَّالِلّٰہِ وَاِنَّا اِلَیْہِ راجعُون۔
مولانا مرحوم حضرت مفتی عتیق الرحمان صاحب عثمانی ؒ کے خصوصی رفقاء میں سے تھے۔جب مجلسِ مشاورت کاقیام عمل میں آیاتھا اس وقت حضرت مفتی ؒ کے شانہ بشانہ مولٰینا افضل حسین بھی اس کی کامیابی کے لیے پیش پیش تھے۔ ہندوستان کے مسلمانوں کے ہر چھوٹے بڑے مسئلہ میں ان کی رائے کی اہمیت تھی۔ مولٰینا کاتعلق کئی مذہبی وتعلیمی تنظیموں سے رہا۔ بورڈ آف اسلامک پبلی کیشنز کے قائم مقام صدر تھے۔جس کے زیر اہتمام ہفت روزہ انگریزی ریڈئنس شائع ہوتا ہے۔ ملّت کے اس درد مند خادم رہنما کے انتقال سے ہم سب کوصدمہ ہواہے۔اﷲ تعالیٰ مرحوم کی مغفرت فرمائے اور متعلقین کو صبرجمیل عطا کرے ۔ آمین۔ [جنوری۱۹۹۰ء]