حکیم شریف الدین بقائی
دہلی کی ایک عظیم خاندانی شخصیت اوربزرگان دین کے محب ِ خاص حکیم شریف الدین بقائی ۲؍ جنوری ۱۹۹۰ء کواس جہانِ فانی سے کوچ کرگئے۔اِنَّالِلّٰہِ وَاِنَّا اِلَیْہِ راجعُون۔
مرحوم بقائی انتہائی نیک،عابد وزاہد اور مُخیر تھے۔دینی اداروں سے ان کی وابستگی قابل قدر تھی۔ادارہ ندوۃ المصنفین کے قدیم ترین ممبر تھے اور حضرت مفتی عتیق الرحمن عثمانی صاحب ؒسے ان کا بڑاہی قریبی تعلق وشغف تھا۔بلکہ یہ کہنا زیادہ مناسب ہوگاکہ حکیم شریف الدین بقائی مفتی صاحبؒ کے شیدائی تھے۔مفتی صاحب کے ساتھ اکثر ان کی نشست رہتی تھی۔ان کے انتقال سے جہاں ان کے متعلقین اوردلّی والوں کوصدمہ عظیم ہواہے،وہیں ادارہ ندوۃ المصنفین وبرہان بھی اپنے قدیم ترین مخلص سے محروم ہوجانے کی وجہ سے سخت رنج وغم سے دوچار ہے۔ ان کے لائق ہونہار صاحبزادے ڈاکٹر معین الدین بقائی سے اظہار تعزیت کرتے ہوئے ادارہ مرحوم کی مغفرت کے لیے دعاگو ہے۔ [جنوری ۱۹۹۰ء]