وسدی جھوک دے لوگ

اساں وسدی جھوک دے لوگ ھاسے

ساڈیاں جھمراں میلے جاگے ہن

ساڈے سارے بھاگ سھاگے ہن

ایں ہسدے وسدے ویلے وچ

ہک دھرتی جایا آیا ھا

ساکوں نندروں آنڑ جگایا ھا

او روشن سجھ امیدیں دا

او نور ھا ساڈیاں دیدیں دا

پر وقت دے اندھے آمر کوں

اونھ ویلھے دے ہک جابر کوں

ساڈا رل کے جیونڑ نی بھانڑاں

ساڈا سانجھا تھیونڑ نی بھانڑاں

او غاصب روح دیاں فصلاں دا

او قاتل ساڈیاں نسلاں دا

اونھ خوشبو کو زنجیر کیتا

ساڈے سجھ کوں آنڑ اسیر کیتا

پچھیں رات اندھاری ڈھک گئی اے

اوندیں نانویں وینڑ کریندے ھویں

اونھ نسل دی کمر وی جھک گئی اے

رل سانجھا تھیو مڑ چاھندے ہن

متاں وستیاں ساڈیاں وس پوون

متاں وستیاں ساڈیاں وس پوون

متاں جھوک تے ساول ول آوے

اینہ آس تے ھنڑ پئے جیندے ھیں

اوندا لعل بلاول ول آوے

                                                                                                                جیے بھٹوجیے، جہانگیر مخلص