پھر قلم پر کُھلا راستہ نعت کا
پھیلتا ہی گیا سلسلہ نعت کا

خوشبوؤں سے لدے لفظ اُترنے لگے
یوں لگا اک چمن کِھل اُٹھا نعت کا

آنکھ میں تازگی سی کوئی بھر گئی
سبزۂ نو بہ نو بچھ گیا نعت کا

میرے لفظوں کو پھر باریابی ملی
ہوگیا ، ہوگیا فیصلہ نعت کا

نعت جس بھی گھڑی اک مکمل ہوئی
اِذن پھر مل گیا اک نیا نعت کا

میں نے کاغذ پہ کچھ لفظ یو نہی لکھے
غور سے جب پڑھا ، شعر تھا نعت کا

اک مہک سی مرے نطق میں بھر گئی
یہ بھی ہے اک نیا سلسلہ نعت کا

حجرۂ جاں میں پھر روشنی ہو گئی
پھر نیا اک دیا جل اُٹھا نعت کا

پھر سے شاخِ سخن تازہ تر ہو گئی
جو کِھلا ہے ابھی پُھول تھا نعت کا