نعت در نعت ہے سلسلہ نعت کا
کیا عجب ذائقہ شعر کا ، نعت کا

نعت لکھتے ہوئے اک جھجک سی رہی
گو ارادہ کیا بارہا نعت کا

دولتِ دو جہاں مل گئی ہے مجھے
اک خزانہ ملا بے بہا نعت کا

سطرِ عنوان ِ نعت آپ ؐ کی ذات ہے
سیرتِ مصطفیٰؐ حاشیہ نعت کا

یہ تو سرکارؐ کی ہے نگاہِ کرم
ورنہ کس کو تھا یاں حوصلہ نعت کا

نعت کا ذکر ہو ، نعت کی بات ہو
دل کو بس بھا گیا تذکرہ نعت کا

تیرگی چھٹ گئی، مجھ کو اب مل گیا
جگنوؤں سے بھرا راستہ نعت کا