برکتوں سے بھرا ہے سفر نعت کا
رُوح پر ہو رہا ہے اثر نعت کا

لفظ آتا ہے تو اِذن ِ سرکارؐ سے
ایک اک لفظ ہے معتبر نعت کا

راہِ مضمون ِ تازہ کہاں بند ہے
تا قیامت کُھلا ہے یہ در نعت کا

دشتِ شعر و سخن کی کڑی دُھوپ میں
سایہ دیتا رہے گا شجر نعت کا

شاخِ معنی ہوئی بارور، آگیا
برگ و بار ثنا اور ثمر نعت کا

اِ س پہ ابلیس کا آنا جانا نہیں
راستہ ہے سدا بے خطر نعت کا

اکتساب اِس میں ذرّہ برابر نہیں
ہے سراسر عطا یہ ہنر نعت کا

حاضری ہو کبھی روضئہ پاک پر
لے کے دیوان یہ مختصر نعت کا