یہ زمیں نعت ہے، آسماں نعت ہے
سوچیے تو یہ سارا جہاں نعت ہے

چاند تاروں کی ساری گزر گاہیں بھی
اور معراج کی کہکشاں نعت ہے

پھول کلیاں ، پرندوں کی سب بولیاں
ہر قدم ہر روش گلستاں نعت ہے

رقص کرتے بگولے بیابان میں
اور صحرا کی ریگِ رواں نعت ہے

موج ہو یا صدف ، قطرہ ہو یا گہر
اور دریا کا آبِ رواں نعت ہے

جنگلوں کی ہوا ہو کہ بادِصبا
صبحِ گُل ہو کہ شامِ خزاں نعت ہے

آیۂ اِنَّما ، سورۂ والضُّحیٰ
اور قرآن کا ہر بیاں نعت ہے

وجہِ تخلیق کون و مکاں آپؐ ہیں
اِس لیے حق یہ ہے کُل جہاں نعت ہے