اندھیروں میں کھلا کیسا دریچہ
حرا سے روشنی دیتا دریچہ

نہ جانے کب کہیں سے نعت اُترے
خیالوں کا کھلا رکھا دریچہ

سدا آئے صدا صلِّ علیٰ کی
نبیؐ کے ذکر کا رسیا دریچہ

ہوائے سبز آتی ہے وہاں سے
بنا ہے گنبدِ خضرا دریچہ

ہوئی مدت مدینے حاضری کی
کھلا ہے اب بھی یادوں کا دریچہ

بہ رنگِ اجتہاد، اجماع ِ اُمت
یہی ہے فِکر تازہ کا دریچہ

مجھے سرشار رکھتا ہے یہ گھر میں
مدینے کی طرف رکھا دریچہ

سخن کو معتبر رکھتا ہے ہر دم
یہ رنگِ نعت میں ڈوبا دریچہ