بے خبر تھا آگہی کا ہر دریچہ مجھ پہ وا تم نے کیا
میں اندھیرے میں کھڑا تھا روشنی سے آشنا تم نے کیا

ہر صدائے نرم و شیریں دب گئی تھی اک خروشِ جبر میں
چیختے چنگھاڑتے اِس ظلم کو پھربے صدا تم نے کیا

آنکھ تھی پر سب مناظر، سب مظاہر اُس کی قدرت میں نہ تھے
نوعِ انساں کی نظر کو پُر بصیرت ،پُرضیا تم نے کیا

خانۂ دل پر تسلط تھا جہالت کی اندھیری رات کا
آفتاب ِ معرفت سے پھر اُجالا صبح کا تم نے کیا

ہر بشر کی ہر نوا میں ، ہر نفس میں بھر گئی تھی آگ سی
جلتے صحرا کی ہوائے آتشیں کو پھر صبا تم نے کیا

اے مرے قرآنِ ناطقؐ! حرف سارے ہو گئے تھے بے ثمر
پھر بیاں کی خشک اور بے جان کھیتی کو ہرا تم نے کیا