شہرِ سخن کو ایسا خزانہ نہیں ملا
صلِّ علیٰ سے بڑھ کے ترانہ نہیں ملا

میرے رسولؐ! تو کہ شہہِ ہست وبود ہے
کوئی بھی تیرا لمحہ شہانہ نہیں ملا

اُٹھا جو تیرے در سے بصد نخوت و غرور
اُس شخص کو کہیں بھی ٹھکانہ نہیں ملا

اک ذرہ تیرے نقشِ کفِ پا کا پا گئی
دستِ ہوا کو ایسا خزانہ نہیں ملا

چُن لیتے تیری راہ کے کانٹے پلک پلک
افسوس! ہم کو تیرا زمانہ نہیں ملا

کیسے کروں میں آیۂ تطہیر کا بیاں
دھرتی کو پھر سے ویسا گھرانا نہیں ملا