آنکھوں کو بھلے لگتے ہیں آثار نبیؐ کے
ہر سمت ہیں بکھرے ہوئے انوارنبیؐ کے

در پیش ہے پھر مرحلہ خیبر و مرحب
پھر آئیں نظر حیدرِ کرارؓ نبیؐ کے

دونوں ہی دل و جان سے قربان تھے اُن پر
مکے کے مہاجر ؓ ہوں کہ انصارؓ نبیؐ کے

بو بکرؓ و عمرؓ ، حیدرؓ و عثمان ِ غنی ؓ تک
ہیں قابلِ اکرام سبھی یار نبیؐ کے

دل ہو کہ دماغ اِن سے منور ہیں ہمہ دم
آنکھوں کا اُجالا ہیں یہ افکار نبیؐ کے

اِن کے ہیں مکیں آیۂ تطہیر کے مالک
ہیں کتنے مقدس در و دیوار نبیؐ کے

سوچیں تو نہیں آتے ہیں گننے میں بھی عابدؔ
اُمت کے لیے اتنے ہیں ایثار نبی ؐ کے