آنکھوں میں جو رقصاں ہوئے آثارِ مدینہ
ہر سمت برسنے لگے انوارِ مدینہ

اب تک ہیں بدستور دل و جان معطر
سانسوں میں گھلی تھی کبھی مہکارِ مدینہ

دل ہے کہ دھڑکتا ہے بہت نامِ نبی ؐ پر
آنکھوں میں نمی لاتا ہے تذکارِ مدینہ

اپنے ہوں پرائے ہوں بٹے فیض برابر
تاریخ کو معلوم ہے معیارِ مدینہ

جو ابنِ اُبی کے ہیں مقلد کبھی اُن پر
کھلنے ہی نہیں پاتے ہیں اسرارِ مدینہ

تعمیر کیا ایک نیا عالمِ اقدار
معمارِ جہاں اصل ہیں معمارِ مدینہ

رحمت کا حصار ایک بناتی ہے مکمل
عالم کو لیے باہوں میں پرکارِ مدینہ