دُکھ جھیلے اور داغ بھی کھائے دین کی خاطر آقاؐ نے
کیسے کیسے رنج اُٹھائے دین کی خاطر آقاؐ نے

طائف کے بازار کے اندر خون نبیؐ کا بہتا تھا
کیسے کیسے زخم اُٹھائے دین کی خاطر آقاؐ نے

شہر کے لوگوں نے جب اُن سے سارے تعلق توڑ لیے
گھاٹی میں کچھ سال بِتائے دین کی خاطر آقاؐ نے

اپنے پیارے شہر سے ہجرت کرنے پر مجبور ہوئے
پتھریلے رستے اپنائے دین کی خاطر آقاؐ نے

دانت شہید ہوئے تھے لیکن اِس سے بڑھ کر یہ دُکھ تھا
حمزہؓ جیسے شیر گنوائے دین کی خاطر آقاؐ نے

اپنے علیؓ کو حکم دیا اور شانوں پر بٹھلایا بھی
صحنِ حرم کے بُت تڑوائے دین کی خاطر آقاؐ نے

آخری خطبے میں لوگوں کو اک جامع پیغام ملا
کتنے پیارے شبد سُنائے دین کی خاطر آقاؐ نے