قیادت کے کنائے ہیں ترے محراب و منبر
ہر اک عالم پہ چھائے ہیں ترے محراب و منبر

تمام انسانیت کے واسطے درسِ ہدایت
مرے ربّ نے بنائے ہیں ترے محراب و منبر

اندھیروں میں بھٹکتی گمرہی کے راستوں میں
ہمیشہ جگمگائے ہیں ترے محراب و منبر


صحابہؓ نے تری تعلیم اور حسنِ عمل سے
بہ ہر صورت سجائے ہیں ترے محراب ومنبر

ترے در سے صداقت کی شعائیں پھوٹتی ہیں
وحی کا نُور لائے ہیں ترے محراب ومنبر

چھڑی جو محوِ گریہ تھی تری فرقت کے اندر
اُسے گودی سلائے ہیں ترے محراب و منبر

نظر میں کیا جچیں گے تخت و تاج ِ بادشاہی
مرے دل میں سمائے ہیں ترے محراب ومنبر