کوئی تو ابرِ مودّت، کوئی سحابِ کرم
حضورؐ اب تو کھلے ہم پہ کوئی بابِ کرم

مرے نبیؐ کا وُہ دربارِ محتشم ہے جہاں
نہ کوئی حد ہے کرم کی نہ کچھ حسابِ کرم

ہماری آنکھوں میں کنکر دکھوں کے چبھتے ہیں
علیؓ کا واسطہ! بخشیں ہمیں لعابِ کرم

وُہ جس کو پڑھ کے مؤ لف قلوب ہوتے ہیں
اب اُترے ہم پہ بھی صفّہ کا وُہ نصابِ کرم

کہ اب تو تشنہ لبی سے دماغ جلتا ہے
سو کوئی ابر کا چھینٹا کہیں سے آبِ کرم

دلوں میں تیرگی تعبیر کی مسلّط ہے
ہمیں عطا ہو کوئی روشنیِ خوابِ کرم

وفورِ رحمتِ عالم مآبؐ اتنا ہے
عجب نہیں کہ میں لا ہی سکوں نہ تابِ کرم

سلام و ذکر سے ایماں کی آبیاری کروں
کھلے گا نخلِ تمنا پہ یوں گلابِ کرم

حروفِ رحمت و رافت میں چوم لوں عابدؔ
کُھلی ہوئی ہے مرے سامنے کتابِ کرم