شہری ہوں مدینے کے یا اعرابِ مدینہ
ہیں قابلِ رشک آپؐ کے اصحابِ مدینہ

قربان ہوئے آپؐ کی اک ایک ادا پر
مکے کے مہاجر ہوں کہ احبابِ مدینہ

دہلیز پہ آقاؐ کی کھڑے ہیں کہ طلب ہو
سیکھے کوئی جبریلؑ سے آدابِ مدینہ

بجھنے نہیں دیتا ہے کسی منظرِ جاں کو
آنکھوں کے دریچوں میں سجا خوابِ مدینہ

اک بار محبت سے تصور تو کرو تم
اللہ بنا دیتا ہے اسبابِ مدینہ

صحرائے عزیمت ہو کہ میدانِ قیامت
پیاسا نہیں مرتا کبھی سیرابِ مدینہ

بج اُٹھیں گے سب تار مری رُوح کے عابدؔ
ہاتھ آئے کہیں میرے وُہ مضرابِ مدینہ