یہ محبت اور شفقت آپؐ کی
ہم تو چاہیں صرف نسبت آپؐ کی

سب جہانوں ، سب زمانوں پر محیط
اور کیا ہے ؟ صرف رحمت آپؐ کی

آپؐ ہی پر تو نبوت ختم ہے
تا قیامت ہے نبوت آپؐ کی

کامیابی دُنیا و عقبیٰ کی کیا؟
کچھ نہیں ہے ، بس ہدایت آپؐ کی

آپؐ کے رستے پہ چلنا شرط ہے
مستند ہے گو شفاعت آپؐ کی

زَمِلُونی زَمِلُونی کی صدا
اے خدیجہؓ ! وُہ سعادت آپؓ کی

اے ابو بکرؓ و علیؓ و زیدؓ پاک
وُہ سعادت اور وُہ سبقت آپؓ کی

سب ہی سرشارِ نگاہِ خاص ہیں
کیسی بابرکت ہے صحبت آپؐ کی

وُہ حرا سے پھوٹنے والی کرن
روشنی جیسی شریعت آپؐ کی

نعت لکھنا، نعت پڑھنا کچھ نہیں
معتبر ہے بس، سماعت آپؐ کی