بہت ہی میٹھی ہیں پیارے رسولؐ کی باتیں
سو آؤ کرتے ہیں اپنے رسولؐ کی باتیں

خدا کرے کہ یونہی عمر اپنی کٹ جائے
کبھی خدا کی تو گاہے رسولؐ کی باتیں

ہر ایک شے پہ مقدم نبیؐ کا فرمایا
ہر ایک بات سے آگے رسولؐ کی باتیں

سو سیدھی سچی ضمانت ہیں کامیابی کی
ہمارے حق میں ہمارے رسولؐ کی باتیں

زمانہ اُس کو خس و خاک میں بدلتا ہے
ہوا میں جو بھی اُڑائے رسولؐ کی باتیں

جو دین سیکھنا چاہے خلوصِ نیت سے
وُہ عائشہؓ سے تو پوچھے رسولؐ کی باتیں

زمانہ یوں ہی تو روشن خیال ہوتا ہے
کہ لو دکھاتی ہیں سچے رسولؐ کی باتیں

خدا بھی اُس کو یقیناََ بُھلائے گا عابدؔ
وُہ شخص جو کہ بھلائے رسولؐ کی باتیں