صاحبِ خلقِ عظیم آپؐ کی ذاتِ اقدس
ہے روؤف اور رحیم آپؐ کی ذاتِ اقدس

شیوۂ خاص سخاوت تھا بنی ہاشم کا
ہے کریم ابنِ کریم آپؐ کی ذاتِ اقدس

ہم کو معلوم نہیں ، صرف خدا جانتا ہے
کتنی ہے کتنی عظیم آپؐ کی ذاتِ اقدس

رحمتیں بانٹتے تفریق بھلا کیا ہو کہ ہے
صاحبِ لطفِ عمیم آپؐ کی ذاتِ اقدس

شاخِ فطرت پہ کِھلا مذہبِ اسلام کا پُھول
اور ایماں کی شمیم آپؐ کی ذاتِ اقدس

آپؐ کے قلب پہ اُترا ہے کلامِ بر حق
حاملِ فکرِ عظیم آپؐ کی ذاتِ اقدس

فوقیت آپؐ کی ہے علم کے ہر درجے میں
کُلِّ ذی علم علیم آپؐ کی ذاتِ اقدس