خوش رنگ و خوش نما ہے وُہ گنبد جو سبز ہے
آنکھوں میں بس رہا ہے وُہ گنبد جو سبز ہے

اِس نامۂ سیاہ کے بدلے پنہ کہاں؟
ہاں ایک آسرا ہے وُہ گنبد جو سبز ہے

چہرے پہ جو لکھی ہے وہ زردی ہے خوف کی
آنکھوں میں تیرتا ہے وہ گنبد جو سبز ہے

دل بھی سفید رنگ کبوتر ہے آس کا
یہ بھی تو ڈھونڈتا ہے وُہ گنبد جو سبز ہے

نیلاہٹوں میں غرق ہے مسموم ہے فضا
تریاق بانٹتا ہے وُہ گنبد جو سبز ہے

میرے لہو سے سُرخ ہے عابدؔ یہ راہِ شوق
مجھ کو بُلا رہا ہے وُہ گنبد جو سبز ہے