غلام آیا ہے آقاؐ مگر ہے شرمندہ
جھکی ہوئی ہیں نگاہیں ، نظر ہے شرمندہ

لبوں پہ کوئی بھی اک لفظ آ نہیں پاتا
دُعا کو ہاتھ اُٹھیں کیا اثر ہے شرمندہ

ہمارے ہاتھ بھی خالی ہیں اور دامن بھی
مدینے جاتے ہیں لیکن سفر ہے شرمندہ

بڑھا سکا نہ یہ ایمان کی حرارت کو
سو میرے دل میں دہکتا شرر ہے شرمندہ

اب ایک در پہ جُھکے بھی تو کیسے جُھک پائے
کہاں کہاں اِسے رکھا کہ سر ہے شرمندہ

مجھے یقین ہے اپنے کریم آقاؐ پر
صدا کرم کی سنوں گا، ’’کدھر ہے شرمندہ‘‘

مجھے سلیقۂ توصیف ہی نہیں عابدؔ
میں نعت لکھتا ہوں لیکن ہنر ہے شرمندہ