راز کیسے ہیں کہ جو دل پہ عیاں ہوتے ہیں
نعت لکھتا ہوں تو پھر اشک رواں ہوتے ہیں

گنگ لفظوں کی قطاریں سی لگی رہتی ہیں
جذبے آنکھوں کی وساطت سے بیاں ہوتے ہیں

کعبۂ جاں میں تواتر سے صدا گونجتی ہے
یوں بلالِ حبشیؓ محوِ اذاں ہوتے ہیں

کارِ دُنیا میں اُلجھنے سے یہ احساس ہوا
ذکِر طیبہ کے بنا لمحے گراں ہوتے ہیں

باریابی کا شرف ملتا ہے درویشوں کو
اُنؐ کی چوکھٹ پہ کھڑے کتنے شہاں ہوتے ہیں

اپنی جانوں سے ہے ناموسِ رسالتؐ بڑھ کر
اُنؐ پہ قربان سبھی خرد و کلاں ہوتے ہیں

ہم گنہگار سہی آپؐ کی اُمت میں ہیں
بات ایسی ہے کہ ایسے بھی کہاں ہوتے ہیں