جب بھی درپیش مصیبت کی گھڑی ہوتی ہے
آپؐ کی ذات مرے ساتھ کھڑی ہوتی ہے

جب خیالوں میں مضافاتِ مدینہ آئیں
چشم کے صحن میں اشکوں کی جھڑی ہوتی ہے

تیرہ بختوں سے کہو سر کو جھکا کر دیکھو
روشنی آپؐ کے قدموں میں پڑی ہوتی ہے


ذکرِ احمدؐ ہی سے تسکین ملی ہے اُس دم
جب کبھی ذات مری مجھ سے لڑی ہوتی ہے

درسِ اُمید ملا شہؐ سے کچھ ایسے کہ سدا
اک کرن سینۂ ظلمت میں گڑی ہوتی ہے

آپؐ کی شان تو بڑھتی ہے مسلسل عابدؔ
جب بھی دُشمن نے کوئی بات گھڑی ہوتی ہے