اُن ؐ کا ہے پیغام آفاقی اور مخاطب سب انسان
یہ پیغام سکوں ہے دل کا اور دماغ کا اطمینان

جس کا جی چاہے آ بیٹھے ، رُوح و چشم کی بھوک مٹے
اُنؐ کی سخاوت افلاکی ہے ساری زمین ہے دستر خوان

اللہ اللہ کیسے تھے اصحابؓ کہ جب بھی ملتے تھے
اک دُوجے سے پوچھتے رہتے کیسا آپ کا ہے ایمان

جنگ میں بوڑھے ، عورتیں ، بچے ، کھیت تلک محفوظ رہیں
اپنے ماننے والوں کو تھا پیارے نبیؐ کا یہ فرمان

دھیان مدینے کا جب ہو تو رُوح بھی بھیگنے لگتی ہے
اک سرشاری چھا جاتی ہے ، جیسے اُترا ہو نروان

ربّ چاہے تو پھر حاضر ہوں روضۂ اقدس پر ہم بھی
لب پہ سلام کے نغمے ہوں اور ہاتھ میں نعتوں کا دیوان

نامِ خدا پر ملک بنا تھا ، نامِ خدا پر قائم ہے
گنبدِ خضرا دیکھ رہا ہے خاص نظر سے پاکستان