نمو کی سمت بتانے کو برگِ نعت آیا
کہ شاخِ فکر بچانے کو برگِ نعت آیا

گناہِ کردہ کی پاداش میں جب عریاں تھا
مرے عیوب چھپانے کو برگِ نعت آیا

سخن کی شاخ کہیں سوکھتی ہی جاتی تھی
سو اس کو سبز بنانے کو برگِ نعت آیا

ہوائے شہرِ دل و جاں بہت مکدر تھی
کدورتوں کے مٹانے کو برگِ نعت آیا

یہ میری روح کی بالیدگی کا ضامن ہے
کہ شاخِ ذات سجانے کو برگِ نعت آیا

اُجڑ چلی تھی ہتھیلی مرے مقدر کی
پھر اِس میں رنگ رچانے کو برگِ نعت آیا

عجیب کانٹے سے اُگنے لگے تھے رستے میں
پھر اِس میں پھول کھلانے کو برگِ نعت آیا