مطلعاتی نعت

سنہری جالیوں سے نور چھنتا ہے رسالت کا
یہی عرفان کا ماخذ ، یہی منبع ہدایت کا

ثویبہ نے دیا تھا شوق سے مژدہ ولادت کا
صلہ اُس کو یقیناََ مل گیا تحدیثِ نعمت کا

اُسی کی سمت جاتا ہے ہر اک رستہ سعادت کا
کُھلا ہے کُل جہاں کے واسطے اک باب رحمت کا

شبِ معراج ہو یا ہو کوئی منظر قیامت کا
اُنہی کو تاج سجتا ہے نبوت کی امامت کا

اُنہی کے صحن سے پُھوٹا شجر امن و محبت کا
اُنہی کے گھر سے نکلا ہے علم رسمِ شہادت کا

قیامت تک رہے گا معتبر رستہ شریعت کا
کہ یہ منشور ہے حسن ِ فلاح ِ آدمیت کا

اِدھر نکلے ، اُدھر سے اک اشارہ ہو شفاعت کا
سُن اے عابد ؔ مزا تب ہے ترے اشکِ ندامت کا