جانا جناب احمد مرسلؐ کے در، ہوا!
حاضر مری جبیں ہی نہیں دل جگر ہوا!

کہنا کہ تیرے نام سے پائی ہیں رفعتیں
اے کوچہ رسولؐ کی پیغام بر ہوا!

میں نے کہا محب ہوں آلِؑ رسولؐ کی
تب سے بہشت کی ہے مری چارہ گر ہوا!

ہے میری التجا یہ بجانب رسولِؐ پاک
مجھ کو ملے تو چوم لوں میں اُنؐ کا در ہوا!

احمدؐ کے دشمنوں کا ٹھکانہ کہیں نہیں
پیغام ہے تبوک و حنین و بدر ہوا!

میرا خیال خام ہے، بے کار میرے لفظ
ہوتی نہ ساتھ ان کی یہ نسبت اگر ہوا

اک میں ہی بس نہیں ہوں فدائے نبیؐ فضاؔ
ہیں آسماں، زمین، شجر اور حجر، ہوا