نعت

اُسی کے اسمِ اعظم سے ہی دل کو شاد کرنے میں
بہت ہی لطف آتا ہے نبیؐ کو یاد کرنے میں

بہ نامِ احمدؐ مرسل حدیثِ دل میں کہتی ہوں
کرم اُنؐ کا ہی شامل ہے مری فریاد کرنے میں

زمیں تا آسماں ہیں منتظر نورِ مجسم کے
حیاتِ جاوداں ملتی ہے ان کو یاد کرنے میں

انھی کے ذکر سے دونوں جہاں نے زندگی پائی
وہی ہیں کار فرما بس جہاں آباد کرنے میں

محمدؐ کی محبت سے فضاؔ کا دل دھڑکتا ہے
یہی اک آسرا کافی ہے دل کو شاد کرنے میں