آنکھ سے دُور سہی، دل کے قریں رہنے دے
میری ہر سانس میں تو خود کو مکیں رہنے دے

میں کہ اک عکس ہوں گمنام سا پس منظر ہوں
کب کہاں کیسے کسی طور کہیں رہنے دے

اک نظر مجھ پہ مرے ماہِ منیر ایسی ہو
کب طلب میں نے کیا زر یا نگیں، رہنے دے

میں ہوں اس قافلۂ عشق سے بچھڑا راہی
میرا کب ٹھور ٹھکانہ ہے کہیں، رہنے دے

تجھ سے منسوب ہوئی، تجھ سے ہی منسوب رہوں
غیر کے آگے جھکے گی یہ جبیں، رہنے دے

دل میں یا آنکھ میں یا دستِ حنائی میں فضاؔ
تیری مرضی ہے جہاں چاہے، وہیں رہنے دے