وفائے دلبراں دیکھی نہ بوئے عاشقاں پائی
تمھارے بعد کب ہم نے ادائے دوستاں پائی

مری ہستی تمھارے بن خزاں آلود موسم ہے
تمھارے ساتھ سے میں نے بہارِ شش جہاں پائی

حسابِ درد کو تم ٹال رکھو بادہ نوشی تک
کہ ہجرِ یار کی مے سے ہے یہ آہ و فغاں پائی

بلائے آسمانی کو نہ سمجھا کچھ مگر یہ دل
ترے ترکِ تعلق سے ہے وحشت بے نشاں پائی

تری ہستی فضائے زیست کا سامان ہے ہمدم
تجھی سے دل نکمے نے ہے خوئے دلبراں پائی