وہی ہم ہیں، وہی تم ہو، وہی دل کی تمنا ہے
تمھارے قرب کی سب خوشبوئوں کا بھید پانا ہے

تمھارے نام سے آباد ہے یہ بزمِ ہستی بھی
تمھارے دم سے ہی یہ موسمِ گل کا فسانہ ہے

وفائے گل کے سب قصے بھی ہیں منسوب تم ہی سے
تمھی سے بلبلوں نے عاشقی کا راز جانا ہے

نظر انداز کرنے کا ہنر تم نے کہاں سیکھا
بہت بیداد گر ہو تم، تمھیں اتنا بتانا ہے

زمینِ دل پہ آج اترو صبا ہے منتظر کب سے
فضاؔ بھی کیف پرور ہے بڑا موسم سہانا ہے