تمھاری آنکھوں میں دلبری کے ہیں رنگ سارے فضا سے کہنا
تمھارے گالوں کے رنگ فطرت کے ہیں نظارے فضا سے کہنا

تمھارے گیسو ہیں دھوپ چھائوں کو رات کرتے، حیات کرتے
ہیں لب تمھارے کہ رات موسم کے فجر تارے ، فضا سے کہنا

تمھارے ہونے سے زندگی ہے تمھارے ہونے سے ہر خوشی ہے
تمھارے ہونے سے موسموں میں بھی ہیں نظارے، فضا سے کہنا

توُ اے پری وش! ہے خوشبو، بادل، دھنک سراپا، ہمہ گلستاں
تمھارے ہونے سے رنگ و بو میں ہیں حسن سارے، فضا سے کہنا

تو خوابِ ہستی کا ہے نظارہ، تو میرے ہونے کا استعارہ
ہے زندگانی ہماری جیسے ہوں دو کنارے فضا سے کہنا

میں پاس آکر بکھر بھی جائوں تو بڑھ کے مجھ کو سمیٹ لینا
یہ خواب پہلو امنگ کے ہیں مچلتے دھارے فضا سے کہنا