جو بادۂ جاں چھلک رہا ہے سنبھال لینا خطا سے پہلے
یہ رند ساقی سے ملتمس ہے عطا ہو مجھ کو عطا سے پہلے

جو لو لگانے کی آرزو ہو یہ جان لینا کہ اس نگر میں
وفا خطا میں شمار ہو گی کہ لب جلیں گے دعا سے پہلے

تری نگہ سے جو بچ گیا وہ اسیر و مجرم خرد کا ہو گا
مسیحا و خضر منتظر ہیں، علاج ہو گا دوا سے پہلے

فنا ہوئے ہیں وہ سارے فتنے، وہ سارے محشر لپٹ گئے ہیں
تری جوانی کی بات پہنچی ہے آج بادِ صبا سے پہلے

ہے چاک دامن مگر فضاؔ کی ہے دید اب بھی سعید مجھ کو
نشاطِ دل کا یہی ہے چارہ فنا سے پہلے، قضا سے پہلے