چاند مدھم ہے، روشنی کم ہے
خواب دھندلے ہیں، آنکھ بھی نم ہے

عمر حاضر جواں دلوں کا کھیل
عمرِ رفتہ عجیب سا غم ہے

زندگانی نثار تم پہ کروں
وار دوں تم پہ سب مگر کم ہے

زندگی! تیرے آستانے پر
موت آنے سے ایک ماتم ہے

دل بھی چاہے کہ زخم تازہ رہیں
وقت کی راگنی بھی مدھم ہے

جس قدر خواہشیں ہیں سینے میں
خضر کی عمر بھی ہمیں کم ہے

آئو ہم بھی گزار لیں لمحے
سانس رکتی ہے آخری دم ہے

تم فضاؔ ہو جہاں پہ چھا جائو
ہم دھواں ہیں ہمیں یہی غم ہے