ابروئوں کے خم میں گھبراتا ہے دل
ان لبوں کا مصرع بہلاتا ہے دل

گفتگو سن کر فصاحت داد دے
دیکھ کر چہرہ مچل جاتا ہے دل

تیرہ چہرہ خواب نگری کا امیں
جاگ جائوں پھر بھی سو جاتا ہے دل

روزِ اول سے جہانِ عشق میں
عقل کو ہر بات سمجھاتا ہے دل

آسمانوں سے کچھ آگے ناز سے
حضرتِ یزداں سے مل آتا ہے دل

تم سے ہے یہ سب جہانِ رنگ و بو
تم کو بھی یہ بات سمجھاتا ہے دل

یہ فراق آلود موسم ہے فضاؔ
ایسے موسم میں تو بھر آتا ہے دل