ہم بھی ہوتے ہیں کہ عشاق جہاں ہوتے ہیں
ہم سے آزاد منش اور کہاں ہوتے ہیں

تم نے جانا ہے تو پلکوں پہ ستارے کیوں ہیں
فیصلے ضبط کے یوں سب پہ عیاں ہوتے ہیں

جب تلک سانس ہے اک آس لگی ہے ہمدم
سانس کی ڈور جو ٹوٹے تو زیاں ہوتے ہیں

میں مقید ہوں تری چشم کے ایوانوں میں
حوصلے اڑنے کے بھی مجھ سے کہاں ہوتے ہیں

تم ہو دھڑکن مرے سینے میں مچلتے دل کی
خون میں ایسے جنوں زاد رواں ہوتے ہیں

مال و دولت سے فضاؔ ان کو غرض کچھ بھی نہیں
عشق والوں کے الگ سود و زیاں ہوتے ہیں