کبھی نگاہوں کی چلمنوں سے نہ راز کہنا، فضا سے کہنا
غمِ جہاں کو تو زندگی بھر پڑے گا سہنا، فضا سے کہنا

رفاقتوں کا ہے دعویٰ تم کو تو اپنے دعوے کی لاج رکھنا
زماں، مکاں کی حدوں سے آگے بھی ساتھ رہنا، فضا سے کہنا

قدم قدم پر ہے خطرۂ جاں، وہ عزم اپنا بلند رکھے
یہ عشق دریا ہے اس کی فطرت ہے الٹا بہنا، فضا سے کہنا

وہ شوخ آنکھیں غزال جن پہ ہیں صدقے واری، مَیں کیوں نہ واروں
یہ چاند، بادل، دھنک، بہاریں، یہ حسن گہنا، فضا سے کہنا

گلوں نے کلیوں نے کترے دامن، قزح بھی آنکھیں چھپا رہی ہے
یہ نازکی کا لباس تم نے غضب ہے پہنا، فضا سے کہنا