دل میں ایسا درد اُٹھا ہے
سارا منظر چیخ رہا ہے

اُس کی یاد ہے دل سے گزری
دل میں کیا کیا شور مچا ہے

میری بات نہ مانے گا وہ
مجھ کو اُس کا خوب پتا ہے

دل اندر غم کی شدّت سے
خون کا اِک دریا بہتا ہے

یاد کے بوٹے سوکھ نہ جائیں
دل دریا پانی دیتا ہے

دل کی باتیں وہ کیا جانے
اُس کا دل تو پتھّر کا ہے

دل پر درد کا پتھّر رکھ کر
مجھ کو اُس جیسا بننا ہے

درد سے دل یہ بیٹھ نہ جائے
اب مجھ کو یہ ڈر لگتا ہے

جھوٹ تو بول نہیں سکتا میں
صادقؔ کا مطلب سچّا ہے