کیا وُہ سَب کچھ بھُول گیا ہے
مجھ کو یقین نہیں آتا ہے

نظمیں غزلیں اور خَط سارے
کیا وہ سب کُچھ پھینک چُکا ہے

میرا اک خط ، تیری نشانی
خط وہ میرے پاس پڑا ہے

تُو جو تنہا چھوڑ گیا تھا
تَنہائی نے ساتھ دیا ہے

’’تَنہائی کا دُکھ گہرا تھا‘‘
ناصِرؔ یہ بھی تو کہتا ہے

رات میں کوئی تو جادو ہے
وہ میرا ہونے لگتا ہے

رات گئے تک اِن گلیوں میں
کوئی آوارہ پھِرتا ہے

وہ اِک دن واپس آئے گا
میرا دل یہ کیوں کہتا ہے؟

جانے والے کب لَوٹے ہیں
صادق تیرا دل جھوٹا ہے