ساغر میں اک پھول کھلا ہے
سارا جنگل مہک اُٹھا ہے

ٹہنی ٹہنی سوکھ چلی ہے
پتّا پتّا خشک ہوا ہے

ہر سو تَنہائی کا عالَم
ہر کوئی تنہا تنہا ہے

شہر کی سڑکیں تو ٹھنڈی ہیں
لیکن میرا دل جلتا ہے

کیسی دہشت پھیل گئی ہے
انساں انساں سے ڈرتا ہے

جنگل ، گلشن ، ندیا ، طوفاں
ہم نے بھی کیا کیا دیکھا ہے!

سونے جیسے کھیت کھڑے تھے
بے موسم بادل برسا ہے

شعر نہیں یہ سننے والے
تو پھیکی غزلیں کہتا ہے

میری مانو اب سو جائو
جانے کب سے جاگ رہا ہے