تُو کیوں اس کو سوچ رہا ہے
وہ تو تجھ کو بھول چکا ہے

دل میں کیسا خوف بھرا ہے
پھول کھلے تو ڈر لگتا ہے

گئی رتوں میں تلاش کرے گا
آج وہ جس کو چھوڑ رہا ہے

میں کہتا ہوں اُسے بھلا دے
یہ کیا روگ لگا بیٹھا ہے

یادیں تو بس بوجھ ہیں دل کا
اور یادوں میں کیا رکھّا ہے

کوئی جو پوچھے حال مرا تو
کہہ دیتا ہوں سب اچھا ہے

پتا پتا ڈالی ڈالی
کس کے غم میں زرد ہوا ہے

ہر سُو پھیلا خوف کا عالَم
خوف یہ کیسے پھیل گیا ہے

صادقؔ تیرا مسئلہ کیا ہے
تو کیوں ماضی میں رہتا ہے