ساری بات سمجھ جاتا ہے
فاع فاعلن پر اٹکا ہے

فاع فعولن فاع فعولن
سارا کھیل فعولن کا ہے

میرے عروض پہ شک کرتا ہے
’’پہلی بارش‘‘ کو دیکھا ہے!

میرا عروض پرکھنے والے
تجھ کو عروض نہیں آتا ہے

پہلے ناصرؔ کو پڑھ کر آ
بات عروض کی گر کرتا ہے

فعلن کی تو سو صورت ہے
تو بس آٹھ لیے پھرتا ہے

’’پہلی بارش ‘‘میں ناصر نے
ہندی بحر کو ہی برتا ہے

میرے شہر کے لوگوں نے تو
ناصرؔ کو بے وزن کہا ہے

تجھ کو وہی سمجھے گا صادقؔ
جس نے ناصرؔ کو دیکھا ہے