گائوں کا رستہ

میرے گائوں جاتا تھا جو
اُس رستے کے دونوں جانب
میٹھے آموں کے کچھ بوٹے
اونچے سایہ دار شجر بھی
کچھ شیشم کے ، کچھ پیپل کے
کچھ لیموں کے چھوٹے چھوٹے

بھینی بھینی خوشبو والے
کچھ پھولوں والے بوٹے بھی
کچھ کانٹوں والے بوٹے بھی

جیسے کیکر ، بیری ، آڑو
کچھ چمکیلے پتّوں والے
پتلی لمبی شاخوں والے
پر پھیلائے رستے اوپر
بادل چھائے رستے اوپر
گرمی میں سب کے سب گھر سے
باہر آئے رستے اوپر
ساجن ، متّر ، بیلی سارے
روز بلائے رستے اوپر

میں جب کالج آتا جاتا
چڑیوں کی چوں چوں سنتا تھا
کوئل کی کُو کُو سنتا تھا
بلبل بھی گانا گاتی تھی

ہجر کے ماروں کی خاطر جب
وصل کے گیت ہوا بنتی تھی
رنگ بہار کے اُس مٹی سے
ہر دل کی دھڑکن چنتی تھی
اک مدّت سے اک عرصے سے
چھوٹ گیا وہ رستہ مجھ سے
جو میرے گائوں جاتا تھا