پتّھر

بیٹھا تھا مَیں کمرے اندر
غور سے میں نے جب دیکھا تھا
آگے ، پیچھے ، اوپر ، نیچے
پتّھر ، پتھر ، پتھر ، پتھر
چیزیں ساری پتھر کی تھیں
چھت دیواریں پتھر کی تھیں
کمرا سارا پتھر کا تھا

صحن میں نکلا میں نے دیکھا
گھر بھی سارا پتھر کا تھا
اک تنہائی گونج رہی تھی

جب میں گھر سے باہر نکلا
روڈ بھی سارا پتھر کا تھا
لوگ بھی سارے پتھر کے تھے
سوچ بھی ساری پتھر کی تھی
شہر ہی سارا پتھر کا تھا

رات ہوئی تو میں نے دیکھا
چاند فلک پر پتھر کا تھا
تارے سارے پتھر کے تھے
چیخ جو ماری پتھر گونجے

چیخ بھی ساری پتھر کی تھی
لوٹ کے آیا خود کو دیکھا
اور پھر میں بھی پتھر کا تھا