ہوٹل والے کا بچہ

اک ہوٹل والا بے چارہ
چائے ہے بناتا دن سارا
ہوٹل کا چولہا جلتا ہے
تو گھر کا چولہا چلتا ہے
اُس کا چھوٹا سا بیٹا ہے
دن سارا چائے دیتا ہے

برتن دھوتا تھک جاتا ہے
چائے دے دے اَک جاتا ہے
ہم دن بھر چائے پیتے ہیں
سب چھوٹو چھوٹو کہتے ہیں

اُس کے ہم عمر سبھی بچے
جاتے ہیں سکول اپنے اپنے
ہر شام پتنگ اڑاتے ہیں
پیزا ، برگر بھی کھاتے ہیں
کھیلیں ، کودیں ، بھاگیں ، دوڑیں
اک دوجے کے دھاگے توڑیں
چائے دینا ، برتن دھونا
کیا اُس بچے کی قسمت ہے؟

کتنے ایسے بچے ہیں جو
چھوٹو ، نکّو ، ساجو ، طوطی
بھولا ، بالا ، کالا ، جیلا
جانے کیا کیا کہلاتے ہیں
بچے یہ کہاں سے آتے ہیں؟