منقبت درِ شانِ مخدوم علی ہجویری داتا گنج بخشؒ

عالم عرفان کے ماتھے کا جھومر آپ ہیں
اس جہاں میں بحر وحدت کے شناور آپ ہیں

ناز جن پہ ہر زماں کرتی ہے بندہ پروری
خواجۂ ہجویر ایسے بندہ پرور آپ ہیں

مخزنِ اسرارِ حق ہیں اور سّرِ عارفاں
اولیا و اصفیا کے گویا رہبر آپ ہیں

بادشاہی ہر دو عالم میں برابر جن کی ہے
ایسے دارا آپ ہیں ، ایسے سکندر آپ ہیں

جن کے لطف و فیض کا تائبؔ نہیں حد و حساب
ایسے بحر بے کراں ایسے سمندر آپ ہیں