بحضور استادِ محترم خواجہ غلام قطب الدین فریدی
(سجادہ نشین دربارِ عالیہ گڑھی شریف)

فریدالدینؒ کی حاصل جسے محبت ہے
اُسی فقیر یگانہ سے مجھ کو نسبت ہے

نہیں ہے آپ کو رغبت کوئی بھی دنیا سے
خوشا! کہ آپ کو شعر و سخن سے رغبت ہے

عطا کیا ہے مجھے آپ نے وہ ذوقِ سلیم
مرے خیال میں اب بے پناہ وسعت ہے

ہوئی ہے فکر بہت نعت میں رواں میری
قسم خدا کی یہ اُن کا ہی فیضِ نسبت ہے

رہِ سخن پہ جو میں ہوں چلا تو میرے حضور
قدم قدم پہ مجھے آپ کی ضرورت ہے

مجھے یہ فخر ہے تائبؔ ہوں آپ کا تلمیذ
میں خوش نصیب ہوں میرے لیے سعادت ہے