اس قدر نقصان ہوتے جا رہے ہیں
ہم تہی دامان ہوتے جا رہے ہیں

یوں خطا اوسان ہوتے جا رہے ہیں
لوگ سب حیران ہوتے جا رہے ہیں

زندگی بے کیف ہوتی جا رہی ہے
درد بے درمان ہوتے جا رہے ہیں

تیرے جانے سے لگا کچھ یوں کہ ہم
بے سر و سامان ہوتے جا رہے ہیں

درد کی دولت اکٹھی کر رہے ہیں
ہم بھی تو سلطان ہوتے جا رہے ہیں

کچھ نشانے پر ہیں اب صیاد کے
کچھ پسِ زندان ہوتے جا رہے ہیں

جزبۂ احساس مرتا جا رہا ہے
شہر قبرستان ہوتے جا رہے ہیں

جو تھے میری جان تائبؔ جی کبھی
اب وہ بارِ جان ہوتے جا رہے ہیں